Ambulanse-Bjørn heidra
- Ja, no vart eg sjokka, sa hovudpersonen Bjørn Helland då han hadde fått summa seg etter folkeoppmøtet og applausen framfor inngangsdøra til Eikelandsfjorden samfunnshus.
Morten Holmefjord
morten-holmefjord@osogfusa.no
Artikkelen held fram under annonsen.
Bjørn Helland vart i føremiddag tildelt «Norges Vels medalje» for lang og tru teneste.
- At ein hadde greidd å halda utdelinga hemmeleg, er no heilt utruleg, sa ein av dei frammøtte.
Her var tidlegare kollegaer frå ambulansetenesta, Raudekrossen, politi, brannvesen, kommune og næraste familie.
- Han trudde han skulle passa Kasper, sa dottera Linda Elise Helland.
Då Ambulanse-Bjørn kom, gjorde han teikn til at her var det berre å rygga, men kom til slutt ut av bilen for å helsa på gamle kjende.
Innanfor vart det snittar og kaffi. Før tildelinga av «Norges Vels medalje» for lang og tru teneste, heldt seksjonsleiar Tone Dalstveit Mosevoll i Helse-Bergen ein liten tale.
- Eg tok utgangspunkt i bokstavane i førenamnet hans. Han er ein Bauta og blir Beundra, alltid ein Ja-person og Jobbar alltid. Bjørn er ein ein Ønskjer å jobba saman med, han er Ryddig, Roleg og Romsleg. Nevenyttig og Nøysam, sa Mosevoll før Helland fekk sølvet på bringa.
