Fokus på god eldreomsorg i Bjørnafjorden?
Det hjelper ikkje innbyggarane i Bjørnafjorden om politikarane skuldar på einingane, kvarandre eller om problema blir overlatne til kommunedirektøren.
Eg har reist til sjøs i mange år som maskinsjef, har jobba på forskjellige fartøy og har vore offiser på offshore fartøy med meir enn 60 mann om bord. Då er det viktig å ha ei god leiing om bord, det vil seia ein eller fleire representantar frå oljeselskap og leiinga for reiarlaget og offiserane på båten.
Å jobba på ein båt er som jobba i eit lite samfunn. Alle om bord er like viktige. Reiarlaget er avhengig av at alle gjer jobben sin på ein tilfredsstillande måte.
Artikkelen held fram under annonsen.
Alle problem som dukkar opp, må skipsleiinga finna ei løysning på. Dersom det er eit graverande problem på båten, sluttar sjøfolka om ikkje dette blir løyst og reiarlaget kan få eit dårlig rykte. Båtar og reiarlag som får eit dårleg rykte, slit med å få tak i kompetente sjøfolk.
Dersom ein har eit problem, må skipsleiinga og reiarlaget identifisera problemet og finna ei løysing raskt. Gjer dei ikkje det, kan fartøyet risikera å mista kontrakten med oljeselskapet.
Dette er ei noko forenkla skisse. Det er dialog mellom reiarlaget, fagforeininga og skipsleiinga for å finna ei løysing som alle kan leva med.
Dersom ein skal omsetja dette til Bjørnafjorden kommune, er det formannskapet, kommunestyret og kommunedirektøren som øvste leiar for administrasjonen, som blir «reiarlaget». Heile den politiske samansetninga representerer skipsleiinga.
Høyrer ein ikkje på signal som kjem frå fleire einingar i kommunen, ser det ikkje ut som ein har ei felles forståing for kva som er problema. Enten signala kjem frå tilsette i barnehagane, på skulane eller sjukeheimen.
Ein må til dømes sjå på kva som skjer i eldreomsorga. På Luranetunet kan det i ei gruppe vera tre tilsette på 10 brukarar.
Viss éin blir sjuk, vert ikkje denne erstatta no når det skal sparast pengar, men dei to som er igjen får meir arbeid, som fører til mindre tid per brukar.
Det er brukarar som krev tre tilsette for stell, kva då viss éin er sjukmeld? Då må ei gruppe låna ein tilsett frå ei anna gruppe, som dermed blir to i den tida den andre gruppa treng hjelp.
Artikkelen held fram under annonsen.
Konsekvensane av det er at vaskerom og kjøken på avdelinga kanskje ikkje vert rydda og vaska skikkeleg, sengetøy blir kanskje ikkje byta etter dusj fordi det ikkje blir tid til det. Sengetøy kan innehalda urin og avføring.
Rullestolbrukaren blir kanskje liggjande lenger i senga og det mellommenneskelege som skaper trivsel og verdigheit, blir det mindre tid til. Dei tilsette må springa på jobben for å strekkja til. Medisinering blir brukt for å roa ned, i staden for å snakka med eller vera til stades for dei som treng det.
Arbeidsmoral og trivsel vil gå ned. Det kan bli misnøye blant kollegaene på motsett skift om kvifor ting ikkje er gjort. Talet sjukmeldingar vil mest sannsynleg gå opp, ikkje ned.
Dei tilsette i kommunen må bli sett og høyrt. Dei må også få nok ressursar til å utføra arbeidet sitt på ein tilfredsstillande måte, utan å verta utbrende på grunn av for lita bemanning til å utføra jobben på ein forsvarleg måte.
Det ser ikkje ut som det er felles forståing for korleis ein skal løysa problema som er i kommunen, eller at det er ein god dialog mellom «reiarlaget» og kommunalt tilsette i kommunen.
Det hjelper ikkje innbyggarane i Bjørnafjorden om politikarane skuldar på einingane, kvarandre eller om problema blir overlatne til kommunedirektøren. Kommunestyret og kommunedirektøren må finna ei felles forståing av problema. Alle har rett på eit forsvarleg arbeidsmiljø og dei eldre har rett på ein verdig alderdom.
Det er viktig å finna ei løysing som innbyggarane i Bjørnafjorden kan leva med.
Tar ein ikkje tak i signal frå tilsette i kommunen, kan ein enda opp som dei «reiarlaget» som ikkje løyser problema på båtane. Dei vil stå utan kvalifiserte arbeidstakarar.
Artikkelen held fram under annonsen.
Helsepartiet og INP har slått seg saman, og vi har programfesta å jobba for bemanningsnorm også i eldreomsorga.
Her er utdrag frå vår helsepolitikk:
Dimensjonering av tenestetilbodet basert på realistiske analysar av brukarens behov.
Gjeninnføring av støttepersonell ved helse- og omsorgsinstitusjonane.
Erstatta innsatsstyrt finansiering med rammefinansiering.
Avvikla ordninga med driftstilskot og innføra reelt, fritt behandlingsval.
Nasjonal bemanningsnorm i omsorgstenesta. 100% stillingar skal vera norma.
Nils Ove Lauvik
Artikkelen held fram under annonsen.
1. kandidat
Bjørnafjorden Industri- og næringsparti
