Harald Døsen, Jan Haaland, Peder Fløysand, Øyvind Tøsdal og Lars Skorpen.

Soleklart gåve-alternativ

Kvart år gjev dei ein sjekk på 5.000 kroner til eit ideelt føremål. I år var Knutabruo soleklart val.

Kenneth Svenningsen kenneth.svenningsen@osogfusa.no

Publisert: 29.10.2015 13:59 Sist oppdatert: 21.03.2017 12:58

Det var færre enn under bru-opninga søndag, men like fullt ein bra horde som møtte fram for å få med seg turlaget til LHL si overrekking av gåvesjekk til «Brukameratane» torsdag.

Overrekkinga fann sjølvsagt stad på brua.

- I fjor gav me sjekk til «Reint vatn»-prosjektet. I år fann me det soleklart å støtta «Brukameratane» og Knutabruo, sa leiar i turgruppa til LHL Os, Dagfin Riple.

Turgjengen til LHL er flittige brukarar av Osmarka.

- Me går på tur her kvar torsdag. Knutabrua vil me bruka mykje i tida framover, seier Riple.

Dagfin Riple og Peder Fløysand er snart klare for overrekking, men ventar berre på eit par forseinka Brukamerat-gutar.

- Alle er velkomne til å bruka brua, men me ser vel helst at hestane held seg borte, skjemta Peder Fløysand då ha såg heste-avføring ved brua.

Takksam gjeng

Til å ta imot sjekken var «Brukameratane» møtt mannssterke opp. Mannen som er opphavet til namnet på brua, Knut Jarle Aspenes, tok imot gåva på vegner av kameratane.

- Alle støtte hjelper. Me er veldig takksame, sa Aspenes.

Peder Fløysand er av same oppfatning.

- Me har fått mykje gode ord i etterkant av opninga, og ser ikkje bort frå at fleire vil støtta prosjektet, sjølv om brua alt står ferdig, sa Fløysand.

Brua kosta i overkant av 1,5 millioner kroner. Etter det «Os og Fusaposten» kjenner til manglar kameratgjengen framleis ein god slump med pengar for å dekkja alle utgiftene.