I dag lanserer Victoria Bakka sin første musikkvideo

Vinnes-jenta Victoria Bakka sin aller fyrste musikkvideo kjem ut i dag. Videoen ser du her.

Victoria debuterte i sommar med singelen Out of Orbit. No har ho fått laga video til den neddempa balladen.

— Eg hadde ikkje så klare formeiningar om korleis videoen skulle bli. Eg har aldri vore med på slikt før, ler 18-åringen.

Men ho følte seg i gode hender.

— Via pressekontakten min, Thomas Holst, fekk eg kontakt med videoprodusenten Marcelo Rifo som held til i Bergen. I sommar var me i studioet hans i Skur 14 ute i C. Sundts gate og gjorde opptaka, fortel Vilde.

— De har gjort han ganske enkel og naken. Var det slik du såg det for deg?

— som sagt, så hadde eg ikkje så klare idear. Men Marcelo er flink til å bruka effektar med green screen, så det gjorde me mykje av. Elles er det berre eg som sit og spelar songen på piano, fortel Victoria.

Ny singel på fredag

Ho har brukt eigne pengar både på innspelinga av den komande plata (som truleg kjem ut 10. oktober) og videoen.

— Når det kjem til pengebruken på prosjektet, vil eg nok prioritera studio-tid og innspeling av musikk. Ei musikkvideo kan vera svært viktig for å visa seg fram og få publikum, men det er kanskje ikkje det eg synest er mest morosamt. Det kjekkaste er å spela inn nye låtar, seier ungjenta.

Neste fredag kjem ho ut med ein ny singel.

— Den låten heiter «Bad addiction». Der får eg vist fram ei ny side av meg sjølv som komponist og artist. Låten er meir «poppa» og kanskje til og med litt country-aktig. Slik kan det jo lett bli når det er Håvard (Skåtun) som har produsert låten, ler Victoria.