Humørfylt Pinocchio til Os
Hugsar du guten med verdas mest berømte nase? Tysdag kjem Riksteatrets Pinocchio til Oseana
Riksteatret gjev deg Carlo Collodis klassiske barneeventyr, gjenfortalt som ei humoristisk, vakker, tankevekkjande, spennande og litt skummel blanding av godt, gamaldags barneteater og moro for heile familien.
Pinocchio er verdas nest mest omsette bok, mest kjend frå Walt Disneys tegnefilmversjon.
Artikkelen held fram under annonsen.
I desse dagar vert det også laga ein Pinocchio-inspirert spelefilm i Hollywood.
Regissør og skodespelar Teodor Janson har dramatisert boka for Riksteatret. Han ynskjer å laga ei framsyning som er like morosam for born som for vaksne.
Halda i handa
- Vi menneske er skapte for å gjera ting saman, og dei aller største opplevingane er dei vi kan dela med andre, seier Riksteatrets sjef Tom Remlov.
- Slik er det å gå på teater med born. Det handlar om ei hand å halda i eller eit fang å sitja på, medan ei forunderleg verd vert trylla fram for bornas auge. Det som skjer er at born og vaksne opplever framsyninga gjennom kvarandre. Snakk om samvær, seier ein entusiastisk teatersjef.
Pinocchio er framsyninga for alle som lurer på om det er naudsynt å gå på skulen, om det er greitt å ete snop heile dagen og vera oppe så lenge ein vil, om penger veks dersom ein grev dei ned og nyttige ting i den duren! Og alle som trur på fear, likar å snakka med grashopper og av og til kjenner seg som ein treskalle. Kanskje finst det også nokre foreldre som treng læra å oppføra seg?
Strålande kritikkar
Pinocchio har fått strålande kritikkar i mellom anna Dagsavisen, Dagbladet, VG og Aftenposten. Foreldrebloggar Casa Kaos skriv: «Har du sjansen, anbefaler jeg på det varmeste at du tar med deg barna og koser deg med forestillingen om den lille tregutten med rød hatt og lang nese.»
Hanne Gjerstad Henrichsen spelar Pinocchios, medan Ivar Nergaard, sist sett på Riksteatret som sjølvaste Doktor Proktor, spelar Grashoppa. Ellers medverkar Elisabeth Moberg, Ingolf Karinen, Håkon Moe, Gard Pedersen, Frank Ole Sætrang og Kristian Winther.
