Gitarrock på XS Lounge

Laurdag står Marie Kristin Dale og trioen MK's Marvellous Medicine på scena hos XS Lounge i Os.

Midtpunktet i MK's Marvellous Medicine er Marie Kristin Dale frå Bergen. I fylgje ei pressemelding er hennar gitar-ferdigheiter åleine visstnok god nok grunn til ein karriere. Legg til ei stemme full av soul og eit øyre for komposisjonar og arrangement, så har du ei komande stjerne.

Mange vil hugsa Dale og MK's Marvellous Medicine frå Osfest. Då veit du i så fall at det er duka for ein laurdagskveld med groovy "post-Hendrix gitarrock".

Beth Hart

Dale og MK's Marvellous Medicine skal vera eit fabelaktig live-band. Noko dei ikkje minst viste under debuten på Bergensfest tidlegare i sommar. Førebels er singelen «When you´re young» tilgjengeleg frå det komande albumet.

Bandet skal seinare i haust spela på Svalbard, og gitarist Dale varma opp for sjølvaste Beth Hart i Bergen.