Fjeld og Paus legg jubileumsturné til Os

Jonas Fjeld og Ole Paus kan i år feira 20-årsjubileum som To rustne herrer. Duoen er fyrste dryppet frå haustprogrammet til Oseana.

Vårprogrammet ved Oseana er berre kome halvvegs, men alt no kjem arrangementssjef Berit Steen med dei fyrste smakebitane av programmet til hausten.

- Vi har jo ein lang horisont når det gjeld booking og planlegging, så haustens program er så godt som fullt. Det heile og fulle programmet blir presentert i midten av juni, men vi slepp nokre av kattane ut av sekken no, seier Steen.

Jonas Fjeld og Ole Paus har tidlegare vitja kunst- og kultursenteret kvar for seg. No kjem dei tilbake som den velkjende duoen To rustne herrer, og konserten har fått namnet «To rustne herrer - hvis helsa holder».

- Dei respektive konsertane dei har hatt her tidlegare har vore så godt som utselde, og tilbakemeldingane var at dette var noko av det beste publikum hadde vore med på. Når desse to no kjem saman, bør publikum vera om seg, rådar Steen.

Bjarte Hjelmeland er det andre av tre namn som no vert lansert. Hjelmeland vitjar Oseana med si nye suksessframsyning «Bjarte Hjelmeland - I lånte fjær». Dette showet går for utselde hus i Bergen.

Siste namn ut i denne omgang er gutane i Absence Crew. Dansegruppa vart kjende for det norske folk gjennom deltaking i Norske Talenter, og har sidan den gong turnert land og strand med sine eigenkomponerte danseshow.

- Absence-gutane har vore her ved fleire høve, og no kjem dei tilbake i regi av Riksteatret med danseframsyninga NORR - Da Gudene Breaket, som er ei breakdance-framsyning om norrøn mytologi. Her blir det både halsbrekkande stunts og spesialeffektar henta rett frå Hollywood, lokkar arrangementssjefen.