Braka laus med Braza

Myrna Braza drog i gang frivilligfesten for Osfest-gjengen i Symrasalen laurdag kveld. Braza vert også å sjå på sjølve Osfesten i august.

Under festivalen 4.-6. august har dei alle mann henda fulle med arbeidsoppgåver. Laurdag kveld fekk dei frivillige ein sjans til å festa og å gle seg over å vera del av eit stort team som til saman skal gjera Osfest 2016 til den største og beste live-festen i Os i mannsminne.

Laurdagens fest markerer startskotet for alle som skal vera med å jobba. I tillegg til å kunna skryta av å ha bidrege til ein historisk festival får hjelparane festival-pass etter innsats.

- Dei får ein dagspass for ein dags innsats, og fullt festivalpass for to dagars innsats. For dei mest ivrige som jobbar i tre dagar ventar det VIP-pass, fortel festivalsjef Ole Reinert Berg-Olsen.

- Men dersom dei skal jobba to-tre dagar, korti skal dei då få brukt passet?

- Det er mykje som skal gjerast både før og i etterkant av arrangementet, så dei som bidreg finn sikkert ein måte å løysa det på, seier Berg-Olsen.

Frå før har dei 660 villige på "interessert-lista". Laurdag melde 123 seg.

Treng fleire enn i fjor

Under Osfest i 2015 var kring 300 frivillige i sving. I år treng dei truleg fleire.

- På borne- og familie-konserten med Markus og Martinus bør me ha veldig mange vakter. Elles har jo arrangementet bygd på seg i alle endar og baugar, så me treng me bortimot 400 frivillige for å ha eit solid og godt arrangementsapparat, seier festivalsjefen.

Han legg til at det sjølvsagt er mogleg å melda seg til tjeneste sjølv om ein ikkje fekk med seg Osfest-vorspielet på laurdag.

- Me har ei rekkje arbeidsgruppar som skal setjast saman: Miljøgruppe, bar- og serverings-gruppe, mat-gruppe, vakt-gruppe, backstage-gruppe, parkerings-gruppe, rigge-gruppe og mange fleire. Me har alltid bruk for folk som vil hjelpa, seier han.

To nye namn

I tillegg til dei ti artistane som til no har vore annonserte fekk dei frammøtte på Osfest-vorspielet opplyst at Myrna Braza og Trine Rein også vert å sjå på festivalen denne sommaren.

Myrna Braza og bandet hennar, inkludert kjærasten og trommisen Thomas «Tomtom» Haugland frå Søfteland takka for tilliten med å gje dei frammøtte i Symrasalen laurdag ein herleg smakebit på kva dei er gode for.

Programmet for Osfest er frå før av som følgjer:

Hovudscenen fredag:

* Vamp

* Frode Alnæs

* Maya Vik

* Odd Nordstoga

* Suzanne Vega

Hovudscenen laurdag:

*  Donkeyboy

* Sigvart Dagsland

* Nik Kershaw

* Neil Finn

* Mike and The Mechanics

I VIP-teltet torsdag spelar Heine Totland.