Sist veke hadde han korona. I kveld tok han VM-bronse.

Nok ein gang har Sverre Lunde Pedersen krona motgang med siger.

Superreserve Sverre Lunde Pedersen tok sin 11. VM-medalje fredag kveld.

Saman med Peder Kongshaug og Allan Dahl Johansson gjekk han inn til bronse på lagtempo i VM i Herenveen.

BT skriv at det lenge såg ut til å ikkje bli medalje på Lunde Pedersen og Norge, men eit fall seint i USAs løp, gjorde at det vart bronsemedalje på det norske laget med tida 3.40,93.

Fjoråret var blytungt for Sverre, og i fjor haust tvilte han for første gong i karrieren på eigen motivasjon og svolt til å halda fram.

Svaret var å hoppa av V-cup-sirkuset for å byggja opp igjen forma ved å trena åleine og vera i lag med familien.

Det ser ut til å ha virka.

For trass korona-sjukdom sist veke, har han gjort all tvil til skamme etter å ha kome inn som superreserve etter at lagkompis Sander Eitrem vart sjuk.

Torsdag kveld gjekk han inn til 7. plass på 5.000 meter, og vart beste nordmann.

I kveld krona han sesongen med ein bronsemedalje god som gull.