Endeleg sommarferie!

Klokka er to minutt på 11. Plutseleg går dørene i 1. etasje på Os ungdomsskule opp. Elevane kjem ramlande ut. Nokre jublar, andre klemmer. Det er sommarferie.

- Det er utruleg digg, seier William Lekven (14).

- Fantastisk, stemmer klassekamerat Even Hilland Lærum (14) i.

- Det vert godt å kunna sova lenge, seier Anders Nordal Bøe (13)... før han legg til:

- Men eg gler meg alt til å byrja i 9. klasse.

- Nei, nei, nei. Stryk det siste, seier dei andre gutane i kor.

Gutane var fram til for få timar sidan elevar i klasse 8A ved Os ungdomsskule. No ventar nesten to månader med fri, før dei vender attende til skulebenken, "eitt" år eldre.

- Kva skal de bruka ferien til?

- Hunden vår skal ha valpar, så eg kjem til å halda meg heime, fortel Lekven.

Elles vert det mykje feriering, fotball og soving, ifølgja gutane.

- Det beste med å ha ferie er å vakna om morgonen og tenkja: Yes, vi har fri i to månader, seier Stian Gamlemshaug (13).

Både òg

Å ha sommarferie er ikkje berre kjekt, skal ein tru åttandeklassingane Amalie Haga Gaassand (13) og Lilly Mae Grønvigh (13).

- Eg føretrekkjer faktisk å gå på skule. Eg synest to månader er litt lenge, seier Grønvigh og legg til:

- Det er kjekt å reisa på ferie og å vera heime, men om sommaren er det mange som er vekkreist. Eg likar ikkje å kjeda meg.

Gaassand synest det er godt å vera ferdig med prøver og lekser - i alle fall for ei stund.

- Kva skal du gjera i sommar?

- Alt og ingenting, seier 13-åringen og smiler.