Støre: Ingen fleire kommuneoppløysingar
Regjeringa kjem ikkje til å løysa opp fleire norske kommunar no, seier statsminister Jonas Gahr Støre (Ap).
Dei siste vekene har det vore mykje bråk om kommunestrukturen både på Sørlandet og i Rogaland.
– No er det sett strek. No kjem det ikkje fleire slike saker. No har vi kome gjennom dei sakene som låg der då vi kom i regjering, seier Støre til NRKs Politisk kvarter.
Artikkelen held fram under annonsen.
Det vekte sterke reaksjonar då regjeringa nyleg valde å seia ja til at Søgne og Songdalen kan få halda folkeavstemming om lausriving frå Kristiansand, som dei blei slått saman med i 2020. Bystyret i Kristiansand sa nei til oppløysing like før jul.
I tidlegare Forsand kommune i Rogaland har eit innbyggjarinitiativ tatt til orde for at den delen av av kommune som frå 1. januar 2020 blei ein del av Sandnes, skulle overførast til Strand. Men onsdag vedtok Kommunal- og distriktsdepartementet at grensa ikkje skal endrast.