Smittetalet auka med 70 prosent: Luranetunet har opna korona-avdelinga «Havblikk»

1.531 nye personar fekk påvist covid-19 sist veke.

Smittetala er sterkt stigande og auka med ca. 70 prosent sist veke.

Det opplyser kommunen på si heimeside.

Det er framleis smitte på Luranetunet, og i nesten alle skular og barnehagar.

I veke 6 vart det registrert 787 positive PCR-svar og 744 innmelde positive sjølvtestar i veke 6. Totalt vart det registrert 1.531 positive testar, mot 960 i veke 5.

Dei smitta er:

Born 0-11 år: 23 prosent

Born og unge 12-17 år: 19 prosent

18-44 år: 41 prosent

45-64 år: 14 prosent

Over 65 år: 2 prosent

Smitte på Luranetunet

Det er registrert enkelttilfelle av smitte blant både tilsette og bebuarar på fleire avdelingar.

Fordi det er vanskeleg å isolera smitta pasientar med uro og vandring, opna kommunen sist veke koronaavdelinga «Havblikk".

Her kan pasientane vandra litt meir fritt. Pleie- og omsorgstenestene har mobilisert arbeidskraft frå dei andre helse- og velferdseiningane for å få på plass ein turnus med nok bemanning og kompetanse.

— Det har vore fantastisk å sjå kor velvillige tilsette og leiarar i alle desse einingane har vore for å få stabla korona-avdelinga på beina, trass i at alle slit med høgt sjukefråvær i eigne einingar, seier leiar for pleie og omsorg, Gro Elisabeth Almås.

Sjukefråvær

Kommunen har høg og aukande smittespreiing, auka sjukefråvær, stor belastning på fastlegar og legevakt (ikkje berre koronarelatert), utbrot i institusjon (sjukeheim) og utfordringar med å ta imot utskrivingsklare pasientar frå sjukehus.

Det er ikkje auke i alvorlege sjukdomsforløp og innleggingar.

Presset på tenestene er framleis stort. Sjukefråværet er høgt i helse og velferd, skule og barnehage.

Kapasiteten på test og smittesporing er utfordrande på grunn av stort sjukefråvær og stor pågang. Det vart teke 1005 PCR-testar i veke 6.

Vaksinering

I veke 7 vil Bjørnafjorden kommune passera 50.000 sette koronavaksinedosar.

Over 50 prosent av alle innbyggjarane har fått 3. dose.

I aldersgruppa 18-44 år har over 75 prosent fått tilbod om 3. dose.

Dei resterande i denne gruppa når tidsintervallet på 20 veker no i februar.

Kommunen har massevaksinering éin dag i veka. I tillegg har dei ein avtale med apotek om vaksinering, for å gjera det lettare for folk å få tatt vaksinen.

Born 5-11 år får tilbod om koronavaksine torsdag 17. februar.