Stort politioppbod etter melding om sakna barn. Men pjokken var berre på besøk hos vener.

Om du vart bekymra då du såg ein haug med politibilar på Søfteland i ettermiddag, kan du no trygt senka skuldrene.

— Når vi får melding om eit sakna barn så trykkjer vi på den store knappen og sender ut ressursane våre, fortel vakthavande på Politiets operasjonssentral i Bergen.

Kl. 16.10 fekk nemleg politiet melding om at eit barn under 10 år var sakna frå heimen på Søfteland.

Dermed raste fleire politipatruljar frå Bergen i retning Os, noko Os & Fusaposten fekk fleire tips om.

— Foreldra var oppriktig bekymra, men så viste det seg at barnet berre var på besøk hos nokre vener. Det heile botna i ei misforståing.

Barnet vart funnen kl. 16.40 og oppdraget vart avslutta kl. 17.20.

Politiet gjer ikkje noko meir med saka.