Folk kan delta i dåp og konfirmasjon på tvers av kommunegrenser

Regjeringa opnar for at folk kan delta i arrangement som dåp, konfirmasjon og bryllaup på tvers av kommunegrenser.

Barne- og familieminister Kjell Ingolf Ropstad (KrF) seier han har fått mange førespurnader frå folk som har utsett arrangement fordi dei vil ha med familie som bur på ein annan kant av landet.

– Då har eg ei god nyheit til dei. Regjeringa endrar rådet om ikkje å samla personar på tvers av kommunegrenser i arrangement, til at vi oppmodar til varsemd, seier Ropstad.

– Bur du i ein kommune med lågt smittenivå, kan du delta i eit arrangement i ein kommune med tilsvarande nivå, seier han.