Ingen tiltak no, men kommunen følgjer situasjonen tett

Bjørnafjorden kommune innfører ikkje strengare smitteverntiltak no, men følgjer situasjonen tett.

Det er konklusjonen etter at kommuneleiinga var i møte søndag ettermiddag. I møtet deltok Statsforvaltaren, Helsedirektoratet, FHI, helseføretaka og kommunane i bergensregionen. På agendaen stod eventuelle felles smitteverntiltak som følgje av smitteutbrotet i bedehusmiljøet på Askøy og i Øygarden.

– Konklusjonen frå møtet er at vi ikkje tilrår ei nasjonal eller felles regional forskrift per no, oppsummerer kommunedirektør Christian F. Fotland og held fram:

– Vi fekk ei god skildring av situasjonen på Askøy og dei tiltaka dei har innført gjennom ei lokal forskrift, men vi ser ikkje eit behov per no for å innføra fellestiltak i regionen.

Kommunen følgjer situasjonen tett vidare.

– Det er viktig at vi alle følgjer dei nasjonale reglane og tilrådingane og at vi avgrensar sosial kontakt på tvers mest mogleg for å ikkje bidra til ei ytterlegare spreiing. Dette er ikkje tida for å reisa på arrangement, møter eller tilsvarande i nabokommunane, avsluttar Fotland.