Skuleelev ved Os barneskule har fått påvist Covid-19 - klasstrinn i karantene

Klassetrinn og lærarar er i karantene i 10 dagar.

Ein 12-år gamal elev ved 7. trinn ved Os barneskule fekk fredag påvist Covid-19. Elevane og lærane på trinnet til eleven er no i karantene i 10 dagar.

Alle nærkontaktar skal vera varsla.

Det skal ikkje vera grunn til å tru at elevane ved dei andre trinna ved skulen har vore utsette for smitte i dette tilfellet.

Dei andre elevane kan difor gå på skulen som vanleg.

Eleven som er smitta har ingen symptom, men blei testa på grunn av nærkontakt med smitta personar i ein annan kommune.

- Den smitta eleven har gjort alt rett, og gjekk i karantene med ein gong beskjeden om ein smitta nærkontakt kom, fortel assisterande kommuneoverlege, Jonas Nordvik Dale.

Dette var det 24. bekrefta smittetilfellet av covid-19 i Bjørnafjorden kommune sidan mars 2020.

Det er berre elevane på 7. trinn som er i karantene, ikkje dei andre i husstanden. Dei aktuelle elevane treng ikkje testa seg før dei eventuelt utviklar symptom på luftvegsinfeksjon, men må uansett halda seg i karantene heile perioden. Elevane vil få heimeundervisning medan dei er i karantene, opplyser kommunen på sine heimesider.