Hans (90): – Klarer eg ikkje skjera dei to skivene sjølv, er det berre til å ringja doktoren

Brødkuttemaskinen er på plass igjen i butikkane, men det er ikkje alle som ser det naudsynt å bruka ho.

Dei store matvarehusa opnar no for at deira butikkar kan ta i bruk brødskjeringsmaskinane igjen. Hans Lekven er 90 år, på full fart mot 91, som han seier. Torsdag plukka han med seg to spleisebrød, men brødkuttemaskinen gjekk han rett forbi.

– Eg var ikkje klar over at maskinen var tilbake, men uansett, klarer eg ikkje skjera dei to skivene til frukosten sjølv, så er det berre til å ringja doktoren, seier han og ler.

At det er spleisebrød Hans et, er ikkje tilfeldig. Hans er tidlegare sjømann, og har fått med seg at han ved å kjøpa spleisebrødet, støtter Stiftelsen Seilskipet Statsraad Lehmkuhl.

– Dei treng all støtte dei kan få, seier Lekven.

Det var fleire som stoppa opp ved brødkuttemaskinen torsdag. Arvid Austgulen var ein av dei.

– Eg var på veg forbi då eg høyrde at de sa at brødmaskinen var tilbake igjen, fortel Austgulen, medan brødet vert kutta opp i maskinen.

– Kva tenkjer du om at maskinen er tilbake?

– Det er veldig bra, så lenge det er trygt.

– Korleis har skivene blitt desse månadene når du sjølv har måtte ta jobben?

– Litt skeive, seier Austgulen og smiler.

– Vi er gjerne blitt litt bortskjemte med desse maskinene, seier han.