Barnehage blir Forskarfabrikk
Espira Ulvenvatnet barnehage satsar på realfag og vert no Forskarfabrikkbarnehage.
- Dette betyr at vi får eit godt innarbeidd verktøy for å arbeida med realfag i vår barnehage, seier styrar Katharina Søreide.
Forskerfabrikken er ein sosial entreprenør innan naturvitskap. Målet er å vekkja interesse hos born og unge for vitskap og teknikk. Det skal bli like naturleg for borna å driva med forsking på fritida, som å halda på med andre aktivitetar.
Artikkelen held fram under annonsen.
- I Kunnskapsbarnehagen Espira er realfag eit av dei områda vi satsar tungt på. Samarbeidet med Forskerfabrikken er eit av dei viktigaste verktøya vi har for å jobba godt med forskning og realfag på borns premissar, seier Søreide.
Laboratorium
Barnehagar som vert plukka ut til å bli forskarfabrikkar, får utstyr som mikroskop, reagensrør, pipettar, frakkar og briller. Det blir óg laga eit laboratorium der borna kan forska saman med dei vaksne i barnehagen.
Personalet i Espira Ulvenvatnet skal no på to ulike kurs hos Forskerfabrikken og læra å gjennomføra om lag 40 ulike forsøk saman med borna. Forsøka skal kunna gjerast både inne i laboratoriet og ute på tur under ulike årstider.
Det er godt dokumentert at denne måten å jobba på stimulerer både forståinga av naturvitskaplege fag og ikkje minst er gunstig for språkutviklinga.
