Herleg bygdakveld med Vassendgutane
300 fusingar hadde ein fortreffeleg kveld då Vassendgutane spelte i Fusa samfunnshus i helga.
Det er gått ni år sidan fest-country-gutane frå Åmdalen i Ørsta sist var å spelte i Fusa. Den gong trekkte dei nok fleire folk, men ifølgje rapportane, var stemninga no fredag like god.
- Me hadde 300 og var sånn passe nøgde med det, sjølv om det nær hadde vore plass til det dobbelte, seier styreleiar i Fusa Samfunnshus, Cecilie Øpstad-Håvik.
Artikkelen held fram under annonsen.
Ho sakna spesielt folk frå Strandvik og Vinnes.
- Frå Holmefjord og Holdhus var det bra med folk, men frå Strandvik og Vinnes var det knapt nok ein sjel. Eg håpar ikkje det har noko med den derre skule-boikot-greien, seier Øpstad-Håvik.
Kjem att
Det etterspurde bygde-rock-bandet var sjølv nøgd med kvelden og kvitterte med fullt sett frå klokka elleve til halv to på natta.
- Dei synest det var morosamt å spela hos oss, og lova å koma att når dei neste gong får sjansen, fortel Øpstad-Håvik.
Vassendgutane budde stansmessig i storhytta på Skjelbreid Poirée.
Neste live-happening i Fusa samfunnshus vert andre juledag. Då vert det fullt program for dei som vil vera med.
- Då arrangerer me full pakke-kveld med middag, revy og dans. Ansvarlege for musikken til dansen vert bandet Bris, fortel Øpstad-Håvik.
