Vann krigekamp - klar for ny
Lysekloster venta ein krigekamp mot Øystese, og fekk det. Til helga ventar ein ny, men annleis krigekamp for munkane.
- Me fekk det me venta mot Øystese. Ein enorm krigekamp. Spelarane viste vanvittig god innstiling, og me vann fullt fortent, seier Lysekloster-trenar Ørjan Sandal.
To tidlege mål
To tidlege mål, gjorde at Lysekloster fekk ein flott start på oppgjeret borte mot Øystese laurdag. Baste Jonassen var sikker frå krittmerke alt etter to minutt, då bortelaget fekk straffe grunna hands i feltet. Etter åtte minutt kom kampens andre og siste mål. Eit langt innkast fann vegen til Gojko Ivkovic som sette ballen i mål.
Artikkelen held fram under annonsen.
- Me hadde fleire sjansar til å auka leiinga, men det ville seg ikkje. Defensivt var me botnsolide, og Øystese klarte ikkje å skapa særleg med målsjansar, seier Sandal.
I faresonen for karantene
Joakim Hjelmeland plukka opp sitt tredje gule kort for sesongen, og må stå over neste kamp.
- Elles kom troppen greitt frå krigekampen. Me har Sindre Flaa ute. Han slit med lyskeproblemer, og har ikkje vore med i dei to siste kampane, seier Sandal.
Det er nokre spelarar som er i faresonen for å få karantene i sesonginnspurten, men Sandal tenkjer ikkje nemneverdig på det.
- Dei har vore i faresonen lenge. Me får få gule kort. Hjelmeland sitt trur eg var det første gule kortet me har fått på tre kampar, seier han.
Tre kampar att
Søndag kjem Varegg på besøk på Lysekloster Framo Idrettspark.
- Kva tenkjer du om neste kamp?
- Varegg har vore veldig gode i haust, så det kjem til å bli ein ny beintøff kamp, men på ein annleis måte. Varegg er eit spelande lag, og dei er gode på det. Me må berre syta for å ha same innstilling som me har hatt den siste tida, og ofra alt for kvarandre, seier Sandal.
Artikkelen held fram under annonsen.
Tre poeng laurdag gjer at Lysekloster framleis toppar tabellen framfor Sotra. Det står att tre kampar av sesongen, og om Lysekloster vinn desse kampane, er dei klare for 2. divisjon. Trenar Sandal, vil framleis ikkje snakka om opprykk.
- Eg veit berre at me har Varegg i neste kamp, seier han.
