Heimesnikra vindusviskarar: - Ikkje greitt, seier politiet

- Var det tilfeldig at bilen var på ferja nattestid, eller var det for å unngå å møta "onkel politi?", skriv tipsar etter å ha blitt vitne til noko som var litt utanom det vanlege.

Os & Fusaposten har fått tilsendt nokre bilete som syner kreativ bruk av det som skal vera øydelagde vindusviskarar eller vindusviskarmotor.

- På ferja frå Sandvikvåg til Halhjem natt til laurdag oppdaga eg ein bil med defekt vindusviskarmotor. Slik det har regna i det sist er det ikkje urimeleg at einkvar vindusviskarmotor har fått nok, skriv tipsar.

Monterte tau på vindusviskarane

Ved nærare augesyn fann innsendar ut at bileigar hadde festa tau i kvar av vindusviskarane.

- Tauet gjekk ut gjennom vindauga. Passasjeren tok på seg hanskar, og veksla mellom å dra i venstre og høgre tau for å styra vindusviskarane. Såvel høgre som venstre vindauge var opna på gløtt.

- Var det tilfeldig at bilen var på ferja nattestid, eller var det for å unngå å møta "onkel politi"?, skriv han.

- Vindusviskarane skal verka

Ikkje veit Os & Fusaposten kvifor vedkomande var ute og rulla på natta. Det som er sikkert er at politiet ikkje er nøgde med kreativiteten til bilføraren.

- Køyretøyet skal vera i forsvarleg og forskriftsmessig stand. Ein kan ikkje halda på med heimeløysingar. Det finst det ikkje moglegheiter for. Vindusviskarane skal verka, seier politioverbetjent Audun Hadler-Olsen, og legg til:

- Dersom politiet hadde kontrollert eit køyretøy i bruk på offentleg veg, der vindusviskarar på frontrute ikkje verkar hadde det blitt nedlagt bruksforbod til dette var utbetra. Ut i frå tid, stad og omstendige for øvrig, har politiet adgang til å vurdera avskilting av køyretøy og å melda forholdet.