Søket held fram for fullt

Friskt mannskap vart måndag morgon sett inn for å finkjemma området etter det som kan ha vore ei kajakk-ulukke. Politiet har fått tips frå ein osing som har vorte fråstolen kajakken sin.

Røde Kors held fram med å søkja i Vestrevågen utanfor Sundøytangen på Søre Øyane måndag morgon. Politiets innsatsleiar, Gisle Antun, opplyser at det blir vurdert å trappa ned søket i sjøen. Denne delen av operasjonen vert handtert av Hovedredningssentralen.

Tjuveri og ulukke?

På land held søket fram for fullt. Då «Os og Fusaposten» var på staden i morgontimane, kom nytt mannskap frå Sivilforsvaret på plass for å avlasta dei som har gjort teneste i natt.

- Grovsøket som vart gjort i natt vert no følgt opp med eit finsøk. Dei går gjennom området meter for meter, for å vera sikre på at ingenting vart oversett i natt.

- Har de fått noko tips knytt til kajakken?

- Ja, ein person busett i Os har opplyst at han har mista ein kajakk. Vedkomande må undersøkja nøyare om det verkeleg er hans kajakk me har funne (Kajakken er av typen Hasle Excursion 520).

- Så det er mogleg at nokon har stjåle kajakken og deretter hatt ei ulukke?

- Ja, det er ein mogleg teori. Samtidig er det ingen personar i området som er meldt sakna, seier Antun.

Sivilforsvaret har oppretta base i vika ved Vestrevågen, sidan dette er sentralt i forhold til staden der kajakken vart funnen, og der det vart høyrt skrik i natt. Politiet ventar at søka vil halda fram utover dagen.