Hit, men ikkje lenger

Funn av potensielle fornminne har no kosta Luranetunet-utbygginga tre månader. Ei avklaring frå riksantikvaren let venta på seg.

På grunn av dei mange fornminna i området mellom Hauge, Lyssand, Moldegaard og Lurane kravde fylkeskonservatoren i fjor å få utføra forundersøkingar på staden der Os kommune har tenkt å etableranye omsorgsbustader for 170 mill. kroner(eks. moms).

Mogleg gravfunn

- Dei fann to buplassar, noko dei trur er ei grav, samt kokegroper, seier prosjektsjef Tor Inge Døsen.

- Kan ein byggja over dette, dersom det er ei grav?

- Det er det me har søkt om. Det er ikkje sjeldan ein får dispensasjon til å gjera dette, men det er berre riksantikvaren som kan gje det, seier Døsen.

Ein kamp mot klokka

Fylkeskonservatoren har innstilt positivt i si tilråding til riksantikvaren, men denne har ikkje gjeve noko signal enno. Døsen kallar situasjonen ein "kamp mot klokka".

- Ei forseinking kostar alltid pengar. No er me tre månader skeivt ute alt. Me var lova svar i januar, og no får me ikkje vita kva som skjer, seier han.

I verste fall kan det også få konsekvensar for kva tid nye Luranetunet kan vera ferdigstilt.

- Bygda treng desse omsorgsplassane. Fram til hausten 2015 har me greidd å ta imot utskrivingsklare pasientar frå Haukeland ved hjelp av Øyeblikkelig Hjelp-senger. Men no er me nådd den smertegrensa at me stundom må betala for liggedøgn på Haukeland i staden, seier Døsen.

Parkerte maskiner

Thomas Jordal hjåentreprenør Consto fortel at medan dei ventar på å gå i gang med hovuddelen av prosjektet, har dei teke for seg ein annan del av oppdraget.

- Me har teke til på den delen av dagsenteret som ikkje er i konflikt med gravene eller dei nye funna. Men dei største maskinene våre står parkerte inn til vidare, seier Jordal.