Nyvinning innan beredskap i Os

Os kommune overrekte i dag ein mobil beredskapsladar til Os Røde Kors. Den første i sitt slag i Noreg.

- Me hugsar godt då stormen Nina herja, og straumen forsvann. Når ein vert straumlaus, ryk mobilane og iPaden fyrst, før PC-en også går tom for straum, seier osing og dagleg leiar i Hordaland Røde Kors, Lars Atle Skorpen og held fram:

- Nokre stader var straumen vekke i fleire dagar. Den gongen var det kort avstand til nokon som hadde straum, men det kan ein ikkje vera sikker på at det alltid er.

Mål om ein stasjon i kvar krins

På Torget fredag føremiddag overrekte ordførar Terje Søviknes den første mobile ladestasjonen i Noreg til Os Røde Kors og Skorpen.

Dei to måtte sjølvsagt sjekka om aggregatet fungerte som det skulle.

- No fauk batterimålaren opp på grønt, smiler Skorpen.

- Det fungerer!

- No håpar me at me kan få til ein dugnadsinnsats, som osingane er så gode på, slik at me kan få slike ladestasjonar i kvar krins, seier Søviknes.

- Køen kan fort bli lang om ein berre har ein ladestasjon. Alle som har tenåringar i hus veit korleis dei blir når dei ikkje har tilgang på elektronikken sin. Køen ville nok vore komisk lang, for alle dei som ikkje stod i kø, seier Skorpen.

150-års-jubileum

Høvet for premieren var markeringa av 150-års-jubileet til Røde Kors. Ei stor mobil utstilling og ein aktivitetsarena er å finna på Torget i Os sentrum i dag. Os er eitt av over 90 stoppestader i Noreg. I går var dei i Bergen, og på laurdag skal dei til Odda.

Søviknes til at han håpar osingar vel å ta turen innom Røde Kors i dag.

- Røde Kors er ein viktig aktør både i frivillig sektor og som humanitær organisasjon. Eg håpar flest osingar nyttar høve til å melda seg inn, om ikkje som aktiv medlem, så i alle fall som passiv, seier Søviknes.

Røde Kors er ikkje berre viktig i ein krisesituasjon.

- Ta berre bryggedansen som eksempel. Røde Kors kjem til å ha eit team tilstades for å sørgja for at arrangementet går trygt og fint føre seg. Røde Kors er viktige også i kvardagen, seier Søviknes.

Gåve i retur

Til sist viste dei fram ein, ny raud benk som skal plasserast på Torget. Ei gåve frå Røde Kors til Os kommune.

- Desse raude benkane vert å sjå over heile landet etter kvart. Han symboliserer verdien av det å snakka saman med andre, og me håpar mange vil nytta høvet til å setja seg ned å snakka med både kjende og ukjende, seier Skorpen.