Sommarshowet blir direktesendt

Os og Fusapostens sommarshow på Bryggedansen laurdag vil bli direktesendt på heimesida. - Skal vi ha eit TV-show, så må vi også ha direktesending, seier Ole Reinert Berg-Olsen.

- I TV-satsinga vår er direktesendingar eit av satsingsområda, seier Berg-Olsen, før historias første lokale direktesending med publikum brakar laus lørdag.

- Det er litt vittig at vi for ca eitt år sidan berre var ei papiravis. Det har skjedd mykje på kort tid, seier han.

For dei som ikkje er i stand til å koma

På nasjonaldagen blei det laga ei utvida sending frå feiringa i både Os og Fusa. Sendinga blei vist på fleire institusjonar, og tilbakemeldingane har vore gode.

- Det fungerte heilt topp. Streamen er mest for dei som er bortreist, utflytta, og ikkje minst dei som ikkje er i stand til å koma. For sjølv om sendinga blir streama, så håpar vi at flest mogleg kjem til "Sjøfronten". Det er det kjekkaste, seier Berg-Olsen.

Kan bli ein tradisjon

Bryggedansen er blitt ein årleg tradisjon. Det kan også TV-sendinga bli.

- Om dette er noko folk liker og vil ha, så er vi positive til å gjera det til ein tradisjon, seier Berg-Olsen.

Produksjonen er stor og allsidig, med musikkinnslag, intervju, aktivitetar og konkurransar.

- Det at det skjer kjekke og spanande ting i ei bygd er med på å gjera det til ein kjekkare stad å bu. Dette er eit tiltak for å gjera Os endå meir attraktivt. Ein kan ikkje lenger seia at Os er ein stad der det skjer lite. Her skjer det mykje, seier Berg-Olsen og smiler.