Ukjent mann tende på ved Oseana

Ein mann iført hettegensar kasta frå seg ein brennande gjenstand på tre-terrassen til Oseana i dag tidleg. Tilsette sløkte brannen.

Klokka 9.46 i dag fekk politiet melding om hendinga. Ein mann hadde kasta eit tøystykke (kanskje ein sokk) innsmurt med brennbart materiale og kasta frå seg på tre-terrassen til Oseana kunst- og kultursenter. Brannen var sløkt av tilsette då politiet kom på staden.

- Dette kunne potensielt ha utvikla seg til noko større. Politiet gjer no undersøkingar knytt til saka, opplyser Audun Hadler-Olsen ved Os lensmannskontor.

- Veldig ubehagelig

- Flammane stod eit godt stykke opp på vindauget vårt, og det blei eit tydeleg svimerke, seier direktør Ole Tobias Lindeberg. Han opplyser at ein tilsett som var på jobb i galleriområdet såg kva som skjedde og fekk med seg ein kollega for å få sløkt branntilløpet.

- Dette er sjølvsagt veldig ubehageleg. Me har jo mange menneske som er innom her i løpet av dagen, seier direktøren.

Ber osingar vera på vakt

For dei tilsette ved Oseana er mannen heilt ukjent, og Lindeberg seier heile hendinga er heilt uforståeleg.

- Det verkar heilt tilfeldig. Difor tenkjer eg det er greitt at osingane får vita om at det går rundt ein person som tilsynelatande prøver å setja fyr på ting i Os, seier direktøren.