Ny låt inspirert av David Attenborough
Orbos nye singel «Sands of time» er inspirert av brevven og BBC-legende David Attenborough.
Ja, det stemmer faktisk. Ole-Reinert Berg Olsen, aka Orbo, utvekslar brev med den 90 år gamle britiske naturfilm-legenda. I september møttest dei for fyrste gong, og etter dette møtet vart låta«Sands of time» til.
- Vi snakka om overbefolkning og det låge utdanningsnivået i den fattige delen av verda, seier Ole.
Artikkelen held fram under annonsen.
Dystert
Eit ikkje spesielt lystig utgangspunkt for ein låt, altså. Med lett dystopiske linjer som: "But no matter what I did, but no matter who I am, I will always be part of human crime, and run against the sands of time", er det vanskeleg å ikkje tenkja på ein stadig meir uunngåeleg klimakatastrofe.
Likevel meiner den samfunnengasjerte artisten at låta ikkje er fullt så dyster som den kan verka.
- Men det er klart at ein kanskje oppfattar teksten på ein annan måte når ein kjenner utgangspunktet og inspirasjonen for den, seier han.
- Er det fyrste gong David Attenborough har inspirert ein poplåt, trur du?
- Ha-ha, det kan faktisk godt henda. Han er vel ikkje veldig mykje brukt i musikkbransjen, ler Ole.
Då Ole og Attenborough møtte kvarandre i haust, gav osingen han nokre av sine eigne CD-ar.
- David Attenborough er mitt store førebilete, så det var ein måte å takka han på, seier han.
Sands of time er fyrste utgjevinga frå Ole sidan hausten 2014.
Artikkelen held fram under annonsen.
Nedprioritert
- Du er låtskrivar for andre artistar, produsent og Osfest-sjef. Har din eigen artistkarriere vorte nedprioritert?
- Nei, eigentleg ikkje. Men eg har trappa litt ned på reisinga, i alle fall til USA, no medan borna er små, seier tobarns-pappaen som lovar at han har meir musikk på veg.
- Eg har spelt inn ein låt med irske Grainne Duffy som vert neste låt ut. Og i løpet av 2016 kjem den nye plata, seier musikaren som i skrivande stund er på farten i Hardanger og Voss for Rikskonsertane.
- Sidan eg er på reisefot, har eg ikkje fått sjekka kva respons låta har fått, men ein del har det i alle fall blitt, seier han.
