Kvåle om Trump som president: - Eg ville følt meg tryggare med Hillary

Fusa-ordførar Atle Kvåle er usikker på kva uttrykk som er passande etter sjokksigeren til Donald Trump i det amerikanske presidentvalet.

Det blei i morgontimane i dag klart at Donald Trump blir USAs neste president.

- Det blei det same som med Brexit (då innbyggjarane i England stemte for å trekkja seg ut av EU, journ.mrk.). Det såg greitt ut då eg la meg, men ikkje då eg stod opp att, seier Fusa-ordførar Atle Kvåle.

Kvåle sat oppe til klokka eitt i natt, og stod tidleg opp for å følgja med på presidentvalet i USA.

- Eg har nok følgd litt meir med enn gjennomsnittet, som det politiske dyret eg er, seier Kvåle.

Håpa på kvinneleg president

Ordføraren hadde håpa på ein demokrat, og ein kvinneleg president.

- Av desse kandidatane heia eg på Hillary Clinton. Eg veit ikkje kva omgrep eg skal ta i bruk om det som har skjedd. Eg ville følt meg tryggare med Hillary. Framtida er meir usikker med Trump, seier Kvåle og utdjupar kvifor Hillary hadde vore eit tryggare val:

- Hillary har solid kunnskap om utanrikspolitikk mellom anna. Det er viktig med verdspolitikken vi er i no, og heile tida er i.

Forsiktig med å døma

Reaksjonane er mange, og fleire uttrykkjer bekymring over at Donald Trump skal styra stormakta USA, og kvifor så mange har stemt slik dei har gjort.

Fusa-ordføraren meiner at vi i Noreg skal vera varsame med å prøva ta amerikanarane i skule om korleis dei skal røysta, fordi det er vanskeleg for oss å setja seg inn i kvardagen til amerikanarane.

- I vår velferdsstat er det små ulikskapar mellom folk. I eit så stort land som USA, er det enorme motsetnader. Ein kan få eit bilete av prosessen i ei avis, og eit anna bilete i eit anna medium. Det å prøva å forstå den gjennomsnittlege amerikanske veljar kan vera vanskeleg, for me har ikkje føresetnader for å setja oss inn i deira situasjon, seier Kvåle.