Inviterer til verdas viktigaste søndagstur

Årets TV-aksjon går til inntekt for Regnskogfondet. - Me manglar bøsseberarar, og vonar at folk melder seg, seier Tove Hille frå Os Frivilligsentral.

Tove Hille og Svein Olsen i Os frivilligsentral var travelt opptekne med å ringa rundt til folk for å prøva å rekruttera bøsseberarar til innsamlingsaksjonen søndag 18. oktober, då me stakk innom fredag.

- Ja, her sit me, som du ser, seier Hille.

Framfor dei låg det kart over kommunen, telefonar, informasjonsbrosjyrer osv. Men dei hadde visst nok kontroll på det som såg kaotisk ut.

- Ja, me har kontroll. Det ser berre ikkje slik ut, seier Hille.

Meldar avbod

Dei ligg ikkje på latsida, og er i full sving med å rekruttera bøsseberarar slik at dei har 180 frivillige når startskotet går søndag.

- I fjor, då Haddy N´jie vitja Os, hadde me 30 bøsseberarar på venteliste. I år manglar me om lag 90, men talet endrar seg frå dag til dag, seier Hille.

Det er faktisk ikkje berre slik at talet aukar. Nokre melder også avbod.

- Det er mykje som kan skje i livet, og me har full forståing for at folk finn ut at dei ikkje hadde tid likevel, seier Hille og held fram:

- Me har stor tru på at me skal klara å rekruttera nok folk, smiler ho.

Forhandlar om vegar

Dei frivillige kjem med ønske om område eller vegar når dei melder seg som bøsseberarar.

- Det hender at det oppstår forhandlingar, smiler Olsen, og held fram:

- Då må me seia at dei vegane har me dekning på, men me kan tilby nokre vegar i nærleiken.

- Det løyser seg som regel. Det er faktisk mange som synest det er kjekt å gå saman med ukjende folk, og å gjera seg kjend med nye stader i kommunen, skyt Hille inn.

Det er ikkje første gong verken Hille eller Olsen er med på innsamlingsaksjonar.

- Eg har ganske god kjennskap til geografien i kommunen. Eg synest berre det er artig med frivillig arbeid, seier Olsen, medan han sit og markerer på utskrivne kartsider av vegar i kommunen.

Skryter av ungdomen

Tove Hille er også glad for å ha ungdomen med på laget.

- Me har flinke ungdomar som hjelper til med kafé i kyrkjetunet og som bøsseberarar. Andre har delt ut flyers om innsamlingsaksjonen på førehand, seier Hille.

Om årets innsamlingsaksjon - "Vi skal vokte regnskogen":

Regnskogen er avgjerande for klodens klima, for vår felles framtid og for 260 millionar menneske som har regnskogen som sin heim. Utan di hjelp kan det vera for seint å redda det som er att.

TV-aksjonen 2015 går til inntekt til Regnskogfondet sitt arbeid med å verna regnskogen i fem land.