«J» for Juleklare førsteklassingar

Samtlege førsteklassingar på Kuventræ har no lært bokstaven J. Gjett kva ord dei kan bruka bokstaven til?

I gulebygget på Kuventræ er det to førsteklassar denne hausten. I A-klassen er det 23 elevar, i B-klassen 22. Begge klassane er godt i gang med juleførebuingane.

- Me hadde juleframsyning for foreldra i går. Då viste me eit stykke om Josef, Maria og Jesus-barnet. I tillegg framførte elevane fleire songar, fortel klassestyrar Mailin Segelvik.

Før eg anar ordet av det får eg eit herleg døme på kor gode 1B-gjengen er til å syngja. Julemorgen-songen frå NRK fjernsyn sit som eit skot, B-klassen syng fleire vers.

Blant fleire faste jule-innslag har B-klassen to kalendrar. Ein vanleg, og ein omvendt.

- Sjå her. Her er pengar me samlar inn til SOS Barnebyar. Pengane får elevane for små-jobbar som dei tek heime, fortel lærar Mailin.

Klare for framsyning

I klasse 1A har dei foreldre-kvelden framfor seg. Det er faktisk denne kvelden (torsdag) at elevane skal underhalda dei vaksne.

- Me skal visa eit stykke som er kalla «Skinnvotten», og eg skal vera forteljar, seier Jenny.

- I tillegg skal me ha kafé, legg Aleksandra til.

- Ja, og me skal syngja minst fem julesongar, seier Jakub.

- Kva har de elles lært i år, då?

- Dei har lært 11 bokstavar. Du ser kva bokstav dei har lært i dag, seier klassestyrar Ingunn Mjøs og peikar på overhead-plansjen bak seg.

Bokstaven J lysar mot meg. Ved sida av står eit juletre.

- Kva kan de bruka J-bokstaven til å seia?

- Me kan seia Jokubas, seier Jokubas.

- Eller Jonas, seier Jonas.

- Eller jul, seier Jenny.

- Jul, ja. Og det er noko de gleder dykk til?

- Jaaaaa...

- J for Ja og Jul. For ein herleg bokstav!

- Ja.