Handbak-kongen Frode Veim Haugland (t.h.) knuste all motstand i dei innleiande rundane.

Trippelt NM-gull til Frode

Osingen Frode Veim Haugland tok to gull og fekk i tillegg gull for beste samanlagde resultat under dagens handbak-NM i Bergen

Anne Marie Aarøen Vangsnes anne-marie@osogfusa.no

Publisert: 17.10.2015 18:59 Sist oppdatert: 21.03.2017 15:11

- Eg er ganske letta over at eg slepp å grava meg ned i skam etter å ha sagt i Os & Fusaposten at eg skulle ta minst to gull, ler Frode Veim Haugland. Han har nettopp vunne gull i klassen minus 95 kilo, for både høgre og venstre hand. I tillegg får han gullet for det samla sett beste resultatet uansett klasse.

- No er eg meisternes meister, seier han herleg ubeskjedent.

Men også andre osingar gjorde det godt under dagens kraftprøve i Bergen Turnhall.

Comeback

Ikkje minst gjorde Andrea Drange eit imponerande comeback i kvinneklassen med gull i høgre og sølv i venstre. Etter å ha slått gjennom i handbak berre 16 år gamal, slutta ho å konkurrera. Sidan då har 26-åringen fått to born og utdanna seg til personleg trenar, og elles latt handbak vera handbak.

- Kva gjorde at du melde deg på NM etter så lang tid?

Imponerande comeback av Andrea Drange som tok eitt gull og eitt sølv i sin fyrste handbak-konkurransen på ti år.

Uttrykket hjå motstandaran fortel at Are Strønen (t.h.) er ein tøff mann å slå.

Os handbakklubb heiar på sine eigne, og bit negler når det er som mest spennande.

Slik kan det gå når sumo-NM føregår i same hallen.

- Haha, det var Frode som melde meg på utan å spørja meg. Han syntest vi trengde fleire damer i Os handbak-klubb, smiler ho.

Sjølv etter å ha vore borte frå handbak i så lang tid, sit teknikken så godt i kroppen. Dermed knuser ho altså til med både gull og sølv.

- Det er eit så flott miljø å vera i. Vi er ein jordnær gjeng, seier ho.

Oldboys

Vidare tok Are Strønen gull i venstre oldboys master og sølv i høgre.

Tore Matre stakk av med to sølv i minus 105 medan Eivind Bøe Johannessen tok bronse i minus 95. Erlend Hjertholm tok gull i venstre junior og bronse i høgre. Veteran Arne Thuen enda på femteplass i klassen minus 85.