Gjekk inn til NM-siger

Erik Tysse tok i helga gull på 5.000 meter i NM i Haugesund. Han var likevel ikkje heilt nøgd med løpet.

- Det gjekk bra lenge. Eg starta forsiktig, men så gjekk eg berre fortare og fortare, seier Tysse.

Men om lag 1.200 meter før mål fekk han litt koordinasjonsproblem.

- Det er nok grunna høgde-opphaldet eg hadde frå slutten av juni til slutten av juli. Eg måtte berre konsentrera meg om kroppen. Difor gjekk farten ned mot slutten, seier han.

Tysse kom likevel i mål på ei sterk tid, 19,19,07, 23 sekund framfor andreplassen.

- Me var fire gode utøvarar som stilte til start, og alle fekk gode tider, seier han.

Mål om topp 12

Neste onsdag reiser Tysse til pre-camp i Hong Kong for å førebu seg til VM i Beijing. 23. august stiller han til start i 20 kilometer kappgang, med eit klart mål for auge.

- Eg har eit mål om å klara topp tolv. Har eg ein veldig god dag, så kan eg klara topp åtte, men då skal mykje klaffa, seier han.