Festspill-satelitten Oseana inviterer til Flamenco-aftan
Fredag og laurdag inviterer Oseana til Flamenco-aftan og "forrykande tolkingar av Ole Bull" - som del av Festspillene i Bergen.
Fredag vert det flamencoaften med Selene Muñoz. Laurdag tolkar fiolinist Annar Follesø Ole Bull.
Meisterklassar i Shanghai
Selene Muñoz er ein internasjonalt anerkjent flamencoartist som opptrer på tradisjonelle spanske flamencofestivalar og på scenar og festivalar rundt om i verda. I Oseana vil ho mellom anna framføra utdrag frå dei sjølvkoreograferte stykka Ritmout og Wild Blooms.
Artikkelen held fram under annonsen.
Selene Muñoz har utdanning frå Danmark og Spania. Ho har opptredd på World Expo World Exhibition i Shanghai og også gjeve meisterklassar for artistar frå Cirque du Soleil i Frankrike og ved Den Kongelige Ballet i Danmark.
Internasjonal oppsikt
Fiolinist Annar Follesø har vakt internasjonal oppsikt med sine tolkingar av Ole Bull, og har tidlegare urframført verk av Bull på Festspillene.
- På denne konserten får vi også høyra fiolinsonatar av Mendelssohn og Brahms, fortel Janne Mari Hjelle ved Oseana
Follesø var den første norske fiolinisten som blei invitert til Festspillene i Salzburg, i 1999. Som solist og kammermusikar har han turnert og spilt konsertar i ei rekkje land, og han har gjesta Festspillene i Bergen fem gonger tidlegare.
Med seg til Oseana har han Julie Ye, som nyleg fullførte utdanninga si ved Guildhall School of Music in London.
Annar Follesø har gjeve ut tre kritikarroste album der Bulls komposisjonar er godt representerte, blant anna ved Ole Bulls fiolinkonsertar i samarbeid med Kringkastingsorkestret.
