Dagleg leiar ved Ravneberghaugen rehabiliteringssenter, Rangveig Klingsheim, viser utsikta dei får frå nybygget på nord-austsida av senteret. Bak ho er første modul på plass.

Modular til 1.000

Torsdag kom dei 10 første modulane til nybygget på Ravneberghaugen rehabiliteringssenter. Tilbygget vert totalt på 1.000 kvm.

Kenneth Svenningsen kenneth.svenningsen@osogfusa.no

Publisert: 05.11.2015 14:41 Sist oppdatert: 21.03.2017 13:08

Parallelt med utvidinga på nordaust-sida av senteret kjem det også eit påbygg til treningsavdelinga på vestsida.

- Totalt utvidar me med 1.120 kvm. Det blir fantastisk, jublar dagleg leiar Ranveig Klingsheim.

Lita feiring

Det eksisterande bygget er på 1.500 kvadratmeter. Men langt frå all plassen er i bruk til dagen.

- Det er mykje kjellarrom og slikt som me ikkje bruker. I så måte får me ei kjensle av at me doblar arealet ved denne utvidinga. Det vert ein ny vår både for pasientar og tilsette, seier Klingsheim.

Då første modul kom på plass torsdag morgon, måtte dei berre feira litt.

Byggjeleiar Steinar Bårtveit og transport-leiar Leif Mo framfor personal-rom-modulen, som torsdag føremiddag stod klar for flytting frå lasteplassen på Thuen til byggeplassen på Ravneberghaugen.

Ranveig Klingsheim gler seg for kvar modul som kjem på plass.

I lag med byggjekomiteen har Ranveig Klingsheim brukt eit utal timar på å detaljplanleggja nybygget. - Ettersom alt skulle koma ferdig laga, måtte me ta stilling til golv, vegg, fargar, stikkontaktar, skap og alt mogleg anna. Det har teke tid, men det har også vore ein kreativ og morosam prosess, seier Klingsheim.

- Me har venta så lenge på dette, så det var litt spesielt. I lag med hovudentreprenør Malthus AS og transportleiaren hadde me ei lita markering, om ikkje anna, så berre for oss sjølve, ler den dagle leiaren.

Trafikerte torsdagar

Bedrifta som leverer modulane er dei same som leverte til Borgafjell barnehage for eit par år sidan. Selskapet held til på Hamar.

- Modulane blir tilkøyrt i dag, dei to neste torsdagane, før siste sending kjem tysdag 24. november. Det vert nok litt tungtrafikk på Stølsvegen desse dagane, åtvarar Klingsheim.

Totalentreprenøren ventar totalt 41 modular. Arbeidet med å setja dei saman tek dei etter kvart.

- Det går fort dette. Medan me plasserer ein, set me i gang med å støypa ny ringmur og gjer klar for neste. Dette har me gjort mange gonger før. Utfordringa på Ravneberghaugen er at det er så dårleg med plass der ute, at me må ha denne "mellom-landinga" her på lasteplassen på Thuen, fortel byggjeleiar i Malthus AS, Steinar Bårtvedt.

Dersom alt går som planlagt, vert firmaet ferdig med arbeidet, og har ferdigbygd det to etasjers-høge nybygget, innan midten av mars 2016.

Rikeleg med plass

Per i dag jobbar det 55 personar på Ravneberghaugen rehabiliteringssentar. Med det nye tilbygget kan senteret ta imot fleire pasienter og samstundes gje dei betre fasilitetar.

- Når dette står ferdig, får me åtte nye pasientrom, fleire kontor, personalrom og garderobe, daglegstove for pasientar, legekontor, rom for ergoterapi behandlingsrom og mykje meir. Det blir ein ny kvardag for oss alle, smiler Klingsheim.

Dessutan vert det endå ein flott utsiktsplass for både tilsette og pasientar.

- Her på framsida skal me byggja terrasse. Sjå den utsikta. Dette blir kjempeflott, seier Klingsheim og ser stolt utover Skeisosen nedanfor.