Fjøra brusa med fjøra, men kom til kort

Fjøra var tøffe både på og utanfor banen, men Lysekloster var klart best, tok tre nye poeng og er no á poeng med tabelloppar Brattvåg.

Etter ein forhaldsvis kjedeleg førsteomgang small det litt utover i andre omgang i Lysekloster Framo Idrettspark laurdag. I første rekkje i form av nokr tøffe duellar. Etter kvart også på sidelinja.

– Ka sa du, sa du noko til meg, lydde det frå trenarbenken til sogningane etter at Lysekloster-trenar Ruben Hetlevik hadde bede Fjøras hovudtrenar om å halda kjeft.

Deretter fekk Fjøra støtte frå assistenttrenaren sin, og med eitt var det full brusing med fjøra og like før handgemeng, før linjedommaren kom til og fekk skilt partane.

– Det kokte litt der, ja, Sa Ruben til Os og Fusaposten etter kampen.

Då hadde han nett ordna sånn nokolunde opp med trenarkollegaen.

– Han sa nokre ufine ting, både om meg og dommaren. Det likte eg ikkje, kommenterte Hetlevik.

Full kontroll

Men trass i tøft knokkelspel frå Fjøra, var Lysekloster aldri særleg truga. Etter 1-0-skåringa til Ken-Joar Lyngås Føyen i det 10. minutt hadde Lysekloster minst 70 prosent av ballinnehavet, og i det store og det heile fortonte mykje av kampen seg som eitt evig langt blå-kvitt angrep.

– Det vart litt statisk å kjedeleg dette, Ruben?

– Jaudå, men slik er det når gjestene på banen vår legg seg i forsvar frå første stund. Då handlar det for oss om å vera tolmodige, ikkje bli for ivrige, men venta på dei rette sjansane.

– Og dei komm mot slutten.

– Ja, det opna seg litt det siste kvarteret. Då måtte Fjøra opp på banen, og dermed fekk me litt opningar å spela i.

I det 74. minuttet, snappa Lysekloster-spiss, Kristoffer Østervold, opp eit tilbakespel, lobba over keeper og ordna 2-0. Resultatet stod seg til slutt.

Artig scenario

Med 2-0-sigeren over Fjøra er Lysekloster á poeng med Brattvåg. Serieleiarane klarte berre uavgjort mot Sotra tidlegare laurdag føremiddag.

– For oss er det eigentleg ingen skilnad. Me har som mål å vinna dei tre siste kampane. Det måtte me før me fekk vita dette resultatet, og det må me no etter at me veit det resultatet, seier trenar Hetlevik.

Lysekloster har Varegg, Sotra og Brann 2 igjen. Rivalene frå møre har Brann 2, Haugesund 2, og som ein skjebnens ironi, Os igjen i årets serie. Eit artig scenario kan vera at Os må vinna i siste kamp for å redda kontrakten i divisjonen, samstundes som de då vil hjelpa sin argaste konkurrent til opprykk til 2. divisjon.