Kan du hjelpa?

I Fusa har det dukka opp ein kulturskatt med foto på gamle glasplater etter bygdefotografen Einar Sundvor (1899-1963). Sundag 28. august vert delar av materialet synt på ei utstilling på kystsogedagen på Engevik gaard.

- Det som dukkar fram av glasplatene er av overraskande god teknisk kvalitet. Sjølv om kopiar av desse bileta ligg kringom i skuffene i dei tusen heimar, får ein med glasplatene tilgang til originalane og kan laga nye doggfriske kopiar og formidla bileta digitalt med høg kvalitet, fortel Erik Vangsnes ved kulturkontoret i Fusa.

Til no har Fusa kommune digitalisert 600 gamle foto frå glasplater.

- Johanna Ljones her ved kulturkontoret har ansvaret for å registrera bileta i ein eigen database. Deler av materialet er alt tilgjengeleg for publikum på internett, opplyser Vangsnes.

Unik portrettserie

Kulturleiaren fortel at Einar Sundvor fotograferte i mange samanhengar. Det er høgtider som bryllaup og konfirmasjon, familiebilete, naturmotiv, båtar, tun og landskap. I samlinga er det også foto som er så gamle at det må ha vore ein annan fotograf enn Einar.

- Det er i tillegg ein unik portrettserie som truleg er teken under 2. verdskrigen i samband med at folk måtte ha identitetskort.

Av det ein har fått identifisert så langt, ser ein at mykje er i frå Lygrepollen og grendene ikring, både i Fusa, Kvinnherad, Kvam og Tysnes.

Einar var gift med Dina Sundvor (1896-1977) som kom frå Nymark på Tysnes.

- Det er eit omfattande arbeid å finna ut kven som er på bileta og kvar bileta er tekne, konstaterer Vangsnes.

No vil kulturkontoret og Johanna Ljones gjerne ha hjelp frå publikum.

I utstillinga på kystsogedagen 28. august vil det vera papirkopiar av alle bileta i samlinga, og kommunen håper mange denne dagen kan hjelpa til med detektivarbeidet.