– Med svigermor i salen blir det siger

Svigermor Duddun er Erik Søftelands største fan. Laurdag sit ho ringside når osingen skal vinna «Århundrets stemme».

– Det blir min fjerde tur til Oslo for å sjå Eirik. Det er sååå moro. Denne gongen blir me ein ekstra stor gjeng med osingar og familie. Han skal få merka støtta, seier Duddun Lindborg.

«Vaktskifte» i Os

Onsdag var Eirik ein kjapp tur heimom heimbygda før han skal tilbake å gjera seg klar for finalen i songkonkurransen på TV2. Onsdag føremiddag var det «vaktskifte» på gjestebrygga.

– Eirik skal passa Live (1 år), medan eg skal på behandling hos Jarle Pedersen, fortel svigermor Duddun.

Eirik er godt likt av svoger William Lindborgs yngste jente.

– Både Alva (storesøster) og Live liker skjegget mitt, sjølv om eg no har kortare enn eg hadde før, smiler Eirik.

Historisk mann

Eirik Søfteland er no klar for sin tredje finale i ein song- eller dansekonkurranse på nasjonal TV. Det er han truleg den første i historia som kan ropa høgt om.

– Ja, du seier noko der. Den tek eg. Tre finalar av fire forsøk, må jo vera bra, smiler han.

Som kjent vart han nummer to i Idol i 2013, vann «Skal vi danse» same år, før han rauk ut noko tidleg i «Stjernekamp» for nokre år sidan.

– Du står i finalen med Øivind «Elg» Elgenes, korleis er det?

– Det er stort. Han er ein fin mann, og ei legende.

– Eg sa det tidleg. Det blir Eirik og Elgen i finalen. Jammen fekk eg rett, ler Duddun.

I salen på laurdag får Dudduns svigerson støtte frå ein heil bunsj.

– Det bir meg og Mia, ho har jo vore med Eirik kvar laurdag bortsett frå ein gong. I tillegg kjem Andreas (Lindborg) og Kaja, karen min Gordon og Mias fetter Marcus frå Sverige.

– Ja, i tillegg kjem pappa (Tord) og Siren, så eg får bra med støtte, smiler Eirik.

Tre songar kvar

I finalen får Eirik og Elg syngja tre låtar kvar. Den første er vald av dommarane, den andre trekt tilfeldig frå eit årstal, medan den tredje er vald av artisten sjølv.

– Eg er veldig nøgd med låtane eg skal framføra. Dommarane valde Metallica-låten «Enter Sandman». Det er ei låt eg diggar. Deretter hamna eg på listetopp i 1957 med Elvis-låta «All shook up», før eg får avslutta med Stevie Wonder-låten «Signed sealed delivered» som eigen favoritt frå 1970-talet, fortel Eirik.

– Og det held til siger?

– Eg ser på det som ein siger å koma til finalen, men er veldig innstilt på å gje alt for å vinna.

– Og for å klara det, treng du all den hjelp du kan få?

– Stemm!!!

– Ps, sendinga byrjar ein halv time tidlegare enn vanleg for å unngå kollisjon med MGP, så følg med, oppfordrar Eirik.

kenneth.svenningsen@osogfusa.no