Satsar på å ta pusten frå publikum

Laurdag om ei veke inviterer medlemene av koret Kor(t)pusten til jubileumskonsert hjå Skjelbreid Poirée. På repertoaret står alt frå salmar og Tom Waits til ulike shownummer.Camilla Kvamme

- Vi har ikkje gjort så mykje ut av dei andre jubilea, så vi hadde lyst til å gjera litt ekstra denne gongen. Konserten vert litt annleis enn korkonsertar plar vera, fortel Elin Kvinge.

I 1990 vart koret Kor(t)pusten etablert. Koret var opphavleg del av revygruppa til Eikelandsfjorden ungdomslag, og var eit blandakor.

Etter nokre år i revygruppas teneste, og ein liten pause, gjenoppstod koret som eit reint damekor.

- I dag er vi om lag 20 medlemer. Det er mange som har vore med opp gjennom åra. Men damer flest treng jo ein pause i samband med fødslar til dømes. Dei som har lengst fartstid er Kjellaug Raunsgard og Hildegunn Austestad, fortel Kvinge.

Sjølv har ho ikkje vore med så lenge. Eller...

- Når eg tenkjer meg om, byrjar det vel å nærma seg ti år, seier ho og ler.

Mingling, latter og song

I samband med jubileumskonserten, har koret leigd lokale hjå Skjelbreid Poirée. Der er det ifølgje Kvinge veldig god akustikk.

- Vi får mykje igjen for den jobben vi har gjort på øvingane, seier Kvinge.

Kordamene starta å øva til konserten i vår. Frå i haust har arbeidet vorte intensivert. Songar av Tom Waits og Ola Bremnes, samt eigne shownummer er noko av det publikum kan gle seg til.

- Det vert mykje variert og fin song, i tillegg får nok publikum seg ein god latter, avslører Kvinge.

Kor(t)pusten har nemleg fått Astrid Skåtun Rysjedal og Britt Mari Gjerde til å vera programleiarar. I tillegg vert det eit musikalsk innslag av Kristin Mjånes Myklebust.

- Det vert ein hyggjeleg kveld med latter, mingling og song. Publikum får òg høve til å ta medaljane og pokalane til skiskyttarane våre nærare i augesyn, slår Kvinge fast.

Gler seg kvar veke

Kvinge fortel at korsongen gjev henne utruleg mykje glede og energi.

- Å syngja åleine er kjekt, men å syngja saman med andre er noko heilt anna. Det er ei fantastisk kjensle når vi får det til å låta bra, seier ho.

Kvinge gler seg til kvar tysdag når det er øving. Damene møtest ein halvtime før øvinga startar for å prata og drikka kaffi og te.

- Medlemene kjem frå alle kantar av kommunen, fortel ho.

På spørsmål om kva som er hennar beste korminne, fortel Kvinge om julekonsertar, nyttårskonsertar, landsstemne og «Syng i Sydvest»-arrangement som koret har delteke i, men det ho set aller størst pris på er...

- Eg må nesten seia øvingane. Då har ein noko å gle seg til kvar veke, seier ho.

- Korleis ligg de an i forhold til laurdagenskonsert?

- Vi er der vi skal vera. Det betyr at vi er nøydde til å skjerpa oss litt for å få det til. Vi har det inne, men vi må halda fokuset, og ta dei siste skritta for å koma i mål, konkluderer Kvinge.

Dirigent for koret er Maria Louise Lister Midtrød.