Tiltalt for mordbrann

52-åringen som tente på huset til ein 90 år gamal mann i Eikelandsosen i Fusa i oktober i fjor, er tiltalt for mordbrann. Dermed risikerer han 21 år i fengsel.

- Mannen set framleis fengsla. I tillegg har Riksadvokaten i Hordaland teke ut tiltale mot han på bakgrunn av straffelovas § 355, det vil seia dersom ein forårsakar brann eller andre liknande ulukker som lett kan medføra tap av menneskeliv, fortel politioverbetjent ved Fusa lensmannskontor, Ove Ivarhus.

Tente på medan 90-åringen sov

Natt til 20. oktober vakna ein 90 år gamal mann av at det var brann i huset hans i Eikelandsosen. Mannen greidde sjølv å sløkkja brannen, men vart sendt til sjukehus med røykskadar.

Få timar seinare vart ein 52 år gamal mann pågripen på ferja mellom Venjaneset og Hatvik. Mannen, som var mistenkt for å ha tent på huset til 90-åringen, køyrte på det tidspunktet rundt i 90-åringens bil. Han hadde òg teke med seg fleire eigedelar frå bustaden til mannen i Eikelandsosen.

Fusa lensmannskontor har etterforska saka i lag med Hordaland politidistrikt.

- Saka var ferdig etterforska i mars. Det har vore eit omfattande arbeid. Det har mellom anna vore sakkunnige inne i biletet, fortel Ivarhus, som har vore etterforskingsleiar i saka.

Risikerer 21 år i fengsel

Strafferamma for forholda som 52-åringen er sikta for er fengsel frå to til 21 år. I tillegg til den alvorlige hendinga i Eikelandsosen er mannen tiltalt for innbrot i to hus i Fusa. Det er førebels ikkje kjent når saka skal handsamast av Nordhordland tingrett.