Kurt-kompis til Osfest

Endre Nordvik er klar for Osfest. Kompisen til Kurt Nilsen får solide skotsmål over alt han spelar.

Endre Nordvik er tredje artist som inngår i Osfest sitt program for laurdag 11. august. Dei to andre artistane/banda som spelar denne dagen er Morten Abel og bandet «Staut».

Den nye Osfest-artisten er berre 24 år gamal, men har alt vore med på ein god del som musikar, låtskrivar og songar. I fjor haust gav han ut sitt første album. Men sotraværingen hadde vore med på mykje før det.

Deltok i MGP

Alt som 16-åring hadde han sin første TV-opptreden. Då som deltakar i talentprogrammet X-Factor på TV2.

To år seinare deltok han i delfinalen i Melodi Grand Prix med ein låt skriven av Samsaya.

Sidan dette har ungguten skrive og jobba med eige materiale.

For tre år sidan møtte han Kurt Nilsen, sidan har han spelt i bandet hans, og skrive litt i lag med han.

Låten «Like old friends» skreiv han og Kurt Nilsen om bord i ein liten robåt på eit vatn ved hytta til Kurt.

Mykje avspeling

Til liks med Kurt Nilsen har også Endre Nordvik Eirik Grønner som produsent. Plata «Suberb Hero» vart til i Grønners studio på Sotra.

Blant låtane frå albumet er «I`m In Love With You». Til no har denne nådd seks millionar avspelingar på Spotify.

Kompis Nilsen er også med på plata og syng i lag med Endre på låta «Let The Good Times In».

Nore Neset-busette Bjørn Sæther er trommis for både Kurt Nilsen og Endre Nordvik. Mykje talar for at han får ein kort reisejobb laurdag 11. august.

kenneth.svenningsen@osogfusa.no