Byggmester Skaatun styrkjer seg

Det lokale tømrarfirmaet har inngått kjedeavtale med Urbanhus. – Dette gjer oss til ein sterkare aktør, seier dagleg leiar Ståle Skaatun.

– Avtalen med Urbanhus gjer at vi styrkjer drifta og får endå meir føreseielege rammer. Med ein slik avtale får vi tilgang til ei ny kundegruppe, seier Skaatun.

– Kvifor går de inn i eit slikt samarbeid?

– Vi meiner dette er rett steg å ta slik byggjenæringa utviklar seg. Ved å samarbeida med ein husleverandør er målet å styrkja oss i marknaden.

– Solid og erfaren verksemd

I ei pressemelding gjev Urbanhus uttrykk for at dei er godt nøgde med å ha skrive avtale med Byggmester Skaatun.

– Huskjeda Urbanhus gler seg over forhandlarstatus med ei så solid og erfaren verksemd – med eit godt omdøme, skriv dagleg leiar Åse Kristin Foss.

Ho fortel at dei ser ein stadig vekst i talet kundar som ønskjer meir enn eit ferdighus, og at dei difor legg vekt på å skreddarsy sine produkt.

- At folk ynskjer sine særpreg på husa, er kanskje ikkje så rart, med tanke på den store mengda digital inspirasjon vi blir eksponerte for, i form av biletdelingtenester som Instagram, Pinterest og liknande, i tillegg til bustadbloggar og interiør- og bustadforum.

Foss legg til at dei gler oss over å kunna ta del i marknaden på Os, i Fusa og Samnanger.

- Marknaden er der allereie, og med den nye hovudvegen frå Bergen, vil dette bli eit solid satsingsområde, kommenterer Foss.

Dreg nytte av fellesinnkjøp

For tre år sidan hadde Os & Fusaposten ei større sak med tømrarane Skaatun. Den gongen vart det poengtert at dei aller helst byggjer noko for fyrste gong og ikkje i form av ferdighus. Det skal dei halda fram med.

– Urbanhus sine produkt har rett nok utgangspunkt i ein katalog, men det er ein digital katalog med husidear, så sit det arkitektar klare til å skreddarsy. Gjennom samarbeidet dreg vi nytte av fellesinnkjøpa, seier Skaatun.