Fann falsk tusenlapp
Om det berre er barnestrekar, eller om nokon har prøvd å trykka falske setlar, er uvisst, men politiet ber folk halda augene opne i ein travel julemånad etter funn av falsk tusenlapp.
Den falske tusenlappen blei funnen ved juletreet i Os sentrum tysdag ettermiddag. Politiet er meldt. Lensmann Oddbjørn Dyrdal, fortel at dei ikkje har fått inn liknande meldingar den siste tida, men at det er viktig å gjera folk merksame på dette.
– Vi går inn i ein periode med mange julemarknader og basarar. Dei som ikkje sit i kassa på butikken, og ikkje tek i mot pengar til dagen, kan bli lurt, seier han.
Artikkelen held fram under annonsen.
På nettopp ei julemesse kan det difor vera lettare å kvitvaska falske setlar.
– Om ein handlar for 300 kroner, får ein med seg ei vare, og 700 ekte kroner. Det er berre til å vera vaken, dei som skal handtera kontantar, seier Dyrdal og legg til:
– Det er også travle dagar i mange butikkar, noko som kan vera med og gjera til at ein blir mindre merksam. Om det er éin falsk setel der ute, finst det nok fleire.
