Overlegen NM-siger til Sverre

Søndag tok han sitt andre allround-NM på rad. Sverre Lunde Pedersen var overlegen på Leangen-isen i helga.

- Eg skvatt litt til då Sindre Henriksen gjekk så bra på 500 m, men etter ein rimeleg bra 5.000-meter seinare på dagen, hadde eg leiinga samanlagt og følte eg hadde bra kontroll på konkurransen, fortel Sverre.

Med sterke 6,45,38 på den regnfylte isbanen i Trondheim var Sverre ganske så suveren. Nærmaste konkurrent klokka inn heile åtte sekund bak osingen.

Utklassing

Grunna sjukdom og skader har Sverre lenge hatt til gode å gå til topps i allround-NM. I fjor slo han Håvard Bøkko. Denne gongen var det klubbkamerat Sindre Henriksen som vart 24-åringens tøffaste utfordrar, men så veldig hard kamp vart det ikkje.

Etter siger på 1.500 m med 1,53,98 og rein utklassing på mil-løpet søndag ettermiddag, var osingens andre allround-tittel i boks.

I striregn og tøffe vindkast gjekk Sverre i mål til 14,20,78 på 10.000 m. Næraste konkurrent var Thomas Henrik Søfteland (ikkje frå Søfteland, men frå Arendal). Han var 13 sekund bak osingen i mål.

- Eg vann ganske klart i fjor også, men i år var det endå større margin. På skeisespråket vann eg med over tre tidspoeng. Det tilsvarer 60 sekund på ein 10.000-meter forklarar Sverre.

Juleferie og trening

I desse dagar er Sverre heime i Os for å feira jul, slappa av og trena litt.

- Det blir fint med litt tid heime, men eg må halda treninga i gang. Alt første helga i januar er det klart for skeise-EM i Heerenveen. Då skal forma forhåpentlegvis vera på topp, konstaterer den nybakte, norske meisteren.