- Fantastisk at vi også kan ha marginane med oss

Ståle Steen Sæthre omtalar 3-2-målet sitt mot Stord som sin raraste skåring i karrieren.

Vel eitt døgn etter at fusingen avgjorde kampen mot Stord og sytte for Lyseklosters tredje trepoengar for sesongen vert han gratulert av gjengen på Akademiet til Lysekloster.

- I dag kan vi feira i lag. A-laget vann for tredje gong, og mange av elevane her vann sine kampar på Eat Move Sleep Cupen på Kuventræ i helga, seier Ståle.

Lysekloster leidde på det meste 2-0 borte mot Tommy Knarvik sitt mannskaps, men til pause stod det berre 2-1.

Baste Jonassen og Hans-Christian Nysæther sytte for dei kvit-blåe sine mål før pause.

Eit stunt av eit mål

Etter kvilen utlikna Stord til 2-2 kring kvarteret før slutt. Dermed såg det lenge ut til at det skulle enda med eitt poeng for Lysekloster.

- At vi til slutt vann var resultat av at vi endeleg hadde litt marginar med oss, og 3-2-skåringa mi i det 88. minutt var jo heilt sjuk. Snakk om å skåra frå dau vinkel, humrar matchvinnaren frå søndag.

Han fekk så absolutt løn for strevet då han jaga ein lang ball frå Martin Eidsvik med to stopparar på seg.

- Eg berre sprang alt eg hadde, så bomma keeper på ballen og brått hadde eg sjansen frå skrått hald. Ballen gjekk i mål via hovudet på ein Stord-forsvarar som forgjæves prøvde stanse ballen, ler Ståle.

Feira med bad

Måndag feira han og vel 20 Akademi-elevar helgens innsats med is før trening og bading i Søvikvågen etterpå