Draumedag på Øvreeide Gard
Det vart besøksrekord på Øvreeide Gard då 260 elevar fekk kosa seg der heile tysdagen.
Øvreeide Gard:
Som belønning for flott innsats under Oseana-framsyninga «Barn av regnbuen», fekk samtlege elevar ved Hegglandsdalen barneskule, Søre Øyane barneskule og Strøno barneskule ein heil draumedag på Øvreeide Gard i Hegglandsdalen.
Artikkelen held fram under annonsen.
Dei tre skulane hadde sidan august i fjor samarbeidd om eit stort kulturprosjekt. Nyleg stod dei saman på scenen i Oseana og song, dansa og spelte for full sal.
Full aktivitet
Tysdag var det altså tid for belønning, og for ei belønning det vart. I strålande vêr fekk elevane verkeleg utfalda seg på det flotte anlegget til Tore Øvreeide og familien.
Her var det pilkast, bil- og bogeskyting, riding på hest, kappkøyring med store traktor-trøbilar, balanseøvingar, fjellklatring, dyrestell, kanopadling og mykje anna.
Det var ikkje mykje tvil om at elevane sette pris på belønninga og opplevinga.
