Er på plass i samband med skulestart: — Fin flyt i avleveringa

Gjennomfører “Aksjon skolevei” ved skular i kommunen.

Tysdag morgon var patruljen på plass på Nore Neset ved barneskulen. Politioverbetjent Anne Lyssand opplyser at dei var der i samband med “Aksjon skolevei”, der politiet har fokus på trafikktryggleik ved skulane.

— Fin flyt i avleveringa trass ein god del trafikk. Busslomma ved 1. klasse vert ofte brukt til parkering. Det var ikkje eit problem i dag. Elles alt ok, skriv Lyssand i ein e-post.

Høg fart

Måndag ettermiddag skal politiet ha fått to ulike meldingar om to motorsyklar som hadde veldig stor fart i Giljavegen.

— Førarane var dekt til og meldar klarte ikkje å notera kjennemerke på syklane. Ingen operative tiltak, skriv Lyssand.

Sjuk katt

Måndag kveld i 23-tida fekk politiet melding om det som skal ha vore ein sjuk katt på Berge.

Katten skal ha vore utanfor eit hus. Politiet rykte ikkje ut.

— Meldar ville kontakta veterinærvakta, skriv Lyssand.