To hjul ramla av lastebil: — Verken gåande, beitande eller køyrande blei trefte

Førar skal ha høyrd ein lyd og innsett at noko ikkje stemde.

Onsdag ettermiddag fekk politiet melding om køyretøystans i Kolskogen. Ein lastebil har ifølgje politiet kome køyrande frå Bergen på E39, og på avkøyringsrampa ved Kolskogen skal føraren ha høyrd ein lyd.

— Det var to hjul på fremre bakaksling som hadde ramla av. Verken gåande, beitande eller køyrande blei trefte. Det var noko olje i vegen. Lastebilen blei parkert utanfor vegbanen, opplyser politioverbetjent Anne Lyssand ved Bjørnafjorden politistasjon i ein e-post.

Vidare skriv Lyssand at Vegtrafikksentralen blei varsla og at dei sette opp skilt for glatt vegbane etter rydding på staden. Lyssand legg til at det ikkje er oppretta sak.