Fotballkamp avlyst: — Måla fauk av garde

Deretter vart forsøket på å flytta kampen frå Kuventræ til Søre Neset stoppa av eit velta tre.

— Det er fyrste gongen eg har opplevd at vi må avlysa ein kamp på grunn av vind, seier trenar Stian Kvåle.

Onsdag skulle 5. divisjonslaget Os 2 ha teke imot Ny-Kronborg på Kuventræ.

— Men måla fauk av garde, så det var rett og slett ikkje forsvarleg, fortel Kvåle.

Det var BA som fyrst skreiv om saka.

— Vi prøvde å flytta kampen til Søre Neset, der banen ligg meir i le enn på Kuventræ.

Men der låg eit velta tre på E39 og stengde vegen.

Dermed var det ein slukøra gjeng som måtte reisa heim med uforretta fotballkamp.

— Ja, det var litt blanda drops kva gjeld humøret, trur eg, seier Kvåle.

Kampen blir truleg spelt på eit seinare tidspunkt.