Unikt samarbeid har nådd helseministerens øyrer

Samarbeidet mellom legevakt og brannvesen i Os har fungert så godt at ryktet spreier seg utover landet. I morgon får Beredskapsbygget på Moberg besøk av statsråd Bent Høie som er nysgjerrig på suksesshistoria.

Det er partifelle av ministeren, varaordførar Marie Bruarøy som har ordna med at Høie stikk innom.

- Eg møtte ministeren på ein konferanse i Oslo i november og spurde han om han hadde høyrt om dette unike samarbeidet. Og det hadde han. Han var svært interessert i det, og no når hanskal til Os likevel passa det godt å gje han ei innføring, seier Bruarøy.

- Brannsjef Stein Gjøsund og kommunalsjef Nils-Petter Borge har reist rundt og halde føredrag om dette samarbeidet me har i Os. Det har vekt oppsikt utover landet, legg Bruarøy til.

Borge og Gjøsund skal informera ministeren når han kjem innom i to-tida i morgon.

- Det er ganske unikt å ordna det slik me har gjort i Os med brannvesenet organisert ikkje under teknisk område, men under helse. I tillegg har me plassert brannstasjon og legevakt i ein og same bygning, og det har vist seg å gje mange gevinstar, seier Gjøsund.

Positive effektar

Sist veke kunne «Os og Fusaposten» melda om atlegevakta stadig opplever aukande pågang, og at dei treng fleire hender. Takk vere at brannvesenet er lokalisert i same bygningen har det likevel gått greitt å hanskast med ein del av utfordringane.

- Seinast i går kveld hadde me ein episode der det var til nytte for legevakta at brannvesenet er i same bygget, fortel brannsjef Stein Gjøsund.

- Nokre rusa personar kom inn på legevakta, og det oppstod ein situasjon som ikkje var kjekk for personalet. Politiet var heller ikkje tilgjengeleg på det tidspunktet. Då kunne legevakta tilkalla brannvesenet som kom og hjelpte til. Det er eit døme på ein god synergieffekt som kjem av at ein rett og slett har tilhald på fysisk same stad, seier brannsjefen. Andre døme på frukter av samarbeidet er at brannvesenet rykkjer ut i lag med legevakta på nattestid. Og heimesjukepleien tek ein kikk på branntryggleiken hjå dei eldre, etter å ha fått opplæring frå brannvesenet.

Til neste år kjem ambulansen

Dei gode resultata gjer administrasjonen i Os kommune endå sikrare på at det er rett å tenkja på mest mogleg samlokalisering av blålysetatane. Neste ut er ambulansen, som i dag har tilhald i Kolskogen.

- Me har inngått ein intensjonsavtale med Helse Bergen som gjer at ambulansen kan plasserast i Beredskapsbygget, dei også, seier prosjektsjef Tor Inge Døsen.

- Det er snakk om å ha ambulansestasjonen på plass innan mars 2017, så då må me gå i gang med bygginga etter sommaren seinast, legg han til.

Politiet også?

- Nokon av oss drøymer om at lensmannen også kan kom opp hit. Då hadde me fått ein utruleg tett og robust naudetat, som kunne ha snakka saman dagleg og hjelpt kvarandre under utrykning, seier Døsen.

- Me prøver å jobba for å få ei politieining inn i same bygget. Dersom me kunne samla alle etatane på den måten ville det vore eit stort løft - ikkje berre for beredskapen -, men også for alle innbyggjarane, seier Bruarøy.

Også lensmann Oddbjørn Dyrdal ser ei rekkje fordelar ved ei slik samlokalisering.

- Me kunne ha løyst oppgåvene på ein endå betre måte dersom me hadde hatt same plassering. Særleg gjeld det i akutte situasjonar. Å planleggja krisesituasjonar er også mykje enklare når avstanden er kort, seier lensmannen.

- Er det ofte behov for samarbeid på tvers i dag?

- Ja, det vert meir og meir av det. God dialog mellom etatane er svært viktig. Ein får meir ut av dei samla ressursane når ein har felles plassering, seier Dyrdal.

Men om politiet får lov til dette er avhengig av korleis lensmannskontora blir organisert vidare.

- Det er ikkje sett noko dato for kva tid eit framlegg skal leggjast fram for ny struktur på lensmannsdistrikta. Så ei eventuell samlokalisering av politiet oppe på Moberg er nok eit stykke fram i tid, seier Dyrdal.