Tommel opp for naturfag og matte
Naturfag og matte er blant favorittfaga til trekløveret som utgjer første klasse på Vinnes friskule. For kort tid sidan lærte 6-åringane om verdsrommet.
- Vi har lært at sola er ei stjerne, fortel Hilde Dalland.
- Og at jorda går rundt sola, seier Dag Almås Solberg.
Artikkelen held fram under annonsen.
- Månen og jorda går rundt sola samstundes, legg tvillingbror Filip Almås Solberg til.
Av andre kjekke oppgåver i første klasse på Vinnes friskule, nemner 6-åringane å jobba med matematikkoppgåver, gym og uteskule. Kvar torsdag er dei nemleg ute. Då tek elevane gjerne turen til gapahuken litt lenger oppe på haugen.
- Kva gjer de på når de er ute?
Alle elevane strekkjer handa ivrig i veret.
- Vi leikar og byggjer litt, fortel Dag.
På uteskulen er 1. til 4. klasse i lag. Kanskje får dei eit glimt at dei to småtrolla, Trolli og Losi, som visst nok skal ha tilhald oppe i skogen også?
- Dei har budd der ei god stund, fortel lærar Kjersti Hellebø Solheim.
- Finst dei? lurer andreklassingen Ylva Opheim på.
Artikkelen held fram under annonsen.
-Har du sett dei, spør læraren.
- Nei...
- Eg har sett dei. Eg såg ein hale som stakk opp her ein dag, fortel Filip.
I tillegg til uteskule, har førsteklassingane sjølvsagt teke fatt på alfabetet. Trioen har faktisk lært så mange bokstavar at dei har kome litt ut av teljinga.
- E, F, D, A, I ..., byrjar dei.
- Vi held på med G no, seier Hilde.
- Vi er heilt ferdige med ei av to arbeidsbøker. Vi har kome meir enn halvvegs i alfabetet, legg lærar Kjersti til.